عريس الغفلة بقلم ايمان شلبي

وشبك صوابعه في صوابعي وانا ببصله باستغراب 
انت بتعمل ايه !
ضحك ضحكه مزيفه وهو بيبص قدامه 
بعمل عريس 
رفعت حاجبي باستغراب 
افندم!
لف برأسه وهو بيبص في عيوني وبيقولي بغموض
يعني لازم نبين للناس أننا بنحب بعض 
رديت بتلقائية
بس انا مش بحبك 
ضحك وهو بيرد بسخريه
قال يعني انا اللي بحبك !
كلها مجرد تمثليه عملناها عشان جدي يكتبلنا الفلوس وكل واحد يروح لحاله 
وبصلي من فوق لتحت بسخريه اكبر
متحلميش باكتر من كده ياميان 
جملته غاظتني فبصلته بقرف وانا بسحب ايدي من أيده بغيظ
انت اللي متحلمش باكتر من كده ولو حتي عقلك وزك وحبيتني ف استحاله انا احبك يا شاطر 

ضحك ببرود 
يبقي خالصين بس اوعي تحبيني اصل انا عارف تأثيري قوي علي اي بنت 
بصيتله بتحدي 
اي بنت إلا انا 
رد بغموض
اوك 
بصيت قدامي وانا بحاول ارسم ضحكه مزيفه علي وشي وخاصه لما شوفت جدي بيقرب مننا وهو باين علي وشه الفرحه 
الف مبروك ياولاد 
ردينا في نفس واحد 
الله يبارك في حضرتك ياجدو 
جدو
انتوا مش متخيلين فرحتي بيكم قد اي ربنا يسعدكم يارب ويرزقكم بالذريه الصالحه 
ياسين 
يااااارب اللهم امين ياجدي 
اما عني اكتفيت بابتسامه وانا ببوس أيده بأحترام 
وبعد شويه خلص الفرح ومشيت الناس ومتبقاش غير العيله بتاعتنا 
مالك ابن عمي بفرحه 
الف الف مبروك ياحبيبتي ربنا يسعدك يارب 
ابتسمت بحب  لاني بعتبره زي محمود اخويا بالظبط بالرغم أنه اخو دارين بس حقيقي مش شبهها خالص !
الله يبارك فيك ياقلبي وعقبالك يباشا لما نفرح بيك كده 
ياسين برفعه حاجب 
قلبك!!
مالك باحراج
انا بعتبر ميان اختي الصغيره و عموما الف مبروك يا ياسين 
ياسين وهو بيرد عليه بجمود 
الله يبارك فيك عقبالك 
جدي 
يالا بقي ياعريس خد عروستك واطلع علي شقتك 
دارين بلهفه 
لا ثواني ياجدو حضرتك قولت ا احم ي يعني قولت ا انه 
جدو وهو بيقاطعها 
عارف يادارين علي الميراث 
وبصلنا بغموض وهو بيقول 
انا فعلا قولت اني هكتب الميراث لو ياسين اتجوز حد منكم بس مقولتش علي الشرط التاني 
ردينا كلنا في نفس واحد باستغراب 
الشرط التاني !!!
جدو وهو بيحط أيده علي كتفي بابتسامه
لما افرح باول حفيد ليا أن شاء الله هكتبلكم الميراث 
برقت عيني وانا برد بتلقائية
مستحييييل !!!!
جدو باستغراب 
هو ايه اللي مستحيل يابنتي 
ياسين بتوتر وهو بيبتسم ابتسامه مهزوزه
هههه ههه متاخدش علي كلامها ياجدو ميان بتحب تهزر صح ياحبيبتي 
قال جملته وهو بيسحبني لحضنه وانا مش فاهمه اي حاجه 
همس في ودني بغيظ
اقفلي بوقك متفضحناش 
كنت لسه هرد بس هو قاطعني 
يالا بقي ياحبيبتي نطلع عشان انا تعبان جدا 
يالا ياجماعه تصبحوا علي خير 
قال جملته وسحبني وخرجنا من البيت وانا بحاول أفلت منه بس كان اقوي مني 
وفجأه بصلي بصه رعبتني وهو بيقول بهدوء مريب 
بطلي تتحركي واطلعي بالذوق 
وقدام نبرته اللي رعبتني هزيت راسي من غير ما انطق حرف زياده 
وصلنا قدام باب البيت وهو ساب ايدي وفتح الباب وسحبني مره تانيه لجوا 
سحبت ايدي منه اول ما دخلنا وانا بقول بعصبيه
ايه انت بتسحب بهيمه !
اتنهد وحط أيده في جيبه وهو بيجز علي أسنانه بغيظ
بجد مشوفتش في غبائك 
شوحت بأيدي بكل عصبيه
ما تحترم نفسك يابني آدم انت 
شد علي شعره بغيظ وهو بيقرب مني وبيشدني من دراعي 
انتي اللي احترمي نفسك وانتي بتتكلمي معايا ياهانم انا جوزك مش واحد مش الشارع !
نفضت ايدي من أيده وانا بزعق بعصبيه
وانا مش خدامه عندك ولما تيجي تتعامل معايا تتعامل باحترام لحد ما نخلص من ام دي شغلانه 
ربع أيده بسخريه
يبقي مش هنخلص 
رفعت حاجبي باستغراب 
يعني ايه
راح قعد علي الكنبه وهو بيسند ظهره عليها بتعب 
يعني طالما جدي حط شرط أننا نخلف يبقي مش هنخلص 
ورفع رأسه وبصلي 
اكيد طبعا أنا مش هخلف من واحده زيك 
ضحكت