الشيطان المتملك

حتقطع البنطلون استنى حلبسك .
كريم بضيق اصل البنطلون داه مش مقاسي اكبر مني و ماما مصرة تلبسهولي انا زهقت منه و عاوز واحد جديد.. 
كاميليا حاضر يا حبيبي حبقي اشتريلك واحد جديد بس مش دلوقتي ماشي يلا عشان تلبس الجزمة و تطلع تفطر الوقت تأخر و بابا يا دوب يلحق يوديك المدرسة و يروح شغله .
خرج كريم من الغرفة و اتجه الى المطبخ ليتناول الإفطار مع عائلته لتذهب كاميليا بدورها الى غرفتها... وجدت اختها نور ترتدي ملابسها...
أخرجت بعض الملابس من الخزانة ليقاطعها رنين
هاتفها..
كاميليا صباح الخير يا هبة ... لا انا لسه في البيت..... طيب مش متأخر مسافة السكة ماشي اشوفك في الجامعة .

رمت الهاتف ثم بدأت في ارتداء ملابسها المكونة من بنطال جينز اسود اللون و قميص ارزق غامق طويل يصل إلى فوق ركبتيها بقليل تركت العنان لشعرها البني الطويل لململت بعض الأوراق و الملازم في حقيبتها المهترئة انتبهت لنظرات اختها التي تكاد تخترقها منذ دخولها لتقول و هي تكمل ترتيب اغراضها مالك يا نور في حاجة .
نور بانكار لا مفيش حاجة بس...
كاميليا بانتباه بس ايه...قولي
نور انت مش ناوية تحطي ميكاب زي البنات اللي في الجامعة .
كاميليا بضحك مش كل البنات اللي في الجامعة بيحطو ميكاب و بعدين انا رايحة أدرس مش احط ماكياج 
نور بتحمس يا سلام يا كامي لو تحطي شوية روج و ماسكارا حتبقي أجمل من كده و مش بعيد تلاقي ابن الحلال اللي يخرجك من الحارة المعفنة دي هو مفيش اولاد أغنياء في جامعتك دي .
زفرت كاميليا بملل فهي تعرف اختها و كرهها للحارة
مالها الحارة يا ست نور دلوقتي بقت مش عاحباكي و بعدين انا لا عاوزة احط روج و لا زفت و الاغنياء دول حيبصوا لواحدة فقيرة زي ليه ها و الا من قلة البنات الاغنياء اللي زيهم .
نور بغيظ يعني عاحباكي عيشة الفقر و الپهدلة دي و الا انت ناوية ترضي تتجوزي العجوز اللي اسمه زكريا داه واقفلك في الرايحة و الجاية و مطفش كل العرسان