صدفة المستحيل

_ تعالي يا أبلة واحد هنا
_ تيجي فين معلش 
بصيت ناحية المكان الفاضي وبعديها ليه وهو قاعد بشعره ودقنه وعيونه الواسعة
_ هتيجي تقعد ازاي يعني! مش فاهم
شاور على المكان كان كرسي فاضي وسط الشباب كلهم شال شنطته وهو لسه باصص ناحيته
_ يلا يا هندزة ساعوا بعضيكوا
_ نساعي بعضينا ايه! هي واحد صاحبنا!! دي بنت هتيجي تقعد وسطنا ازاي!!
_ حطوها في اي حته اعتبروها شنطة
شنطة!!! انا شنطة!! لولا الحوجة وان دا ممكن يكون آخر اتوبيس طالع انا كنت أ....
_ تعالي
قالها على مضد شديد وهو بيشيل الشنط
_ خشوا جوا شوية
_ نخش فين يا يونس نلزق في بعض يعني!

_ اه يا علي الزقوا في بعض
قعدت جمبه وهو بيلم رجله بصتله بنص التفاتة كان باين عليه انه متعصب ومتوتر في نفس اللحظة ابتسمت انه لسه في رجالة بتتكسف وان في رجالة شبه وصف الروايات
سبحان الله طمع في حسن لايق عليه.
_ الأجرة يا حضرات
سمعته وهو بيتمتم جمبي بصوت هادي
_ اهو دا الي فالح فيه
_ خد يا يونس كدا تلاتة
مسك الفلوس وبص ناحيتي وانا بحاول اشيل الشنطة لكن لو كنت قلعتها كنت هضطر ألمسه أو اخبط فيه
_ خد يسطا الكنبة الي ورا
_ لا لا ثواني انا هطلع الفلوس دلوقت
_ خلاص مش مشكلة
_ لا أنا بس...
وخبطت فيه اتنهدت بهدوء
_ ابقي ادفعي الفلوس اما تيجي تنزلي
وبص قدامه حط السماعات في ودنه وغمض عنيه راقبت رعشة رموشه وهو نايم لحد ما العربية وقفت مرة واحدة في الطريق
كلنا اتردينا لقدام بما فيهم هو فتح عنيه وهو بيسمع السواق
_ لا مؤخذة يا حضرات شكل العروسة بتاخدلها راحة
_ يعني العروسة بتاعتك تاخدلها راحة وشغلنا احنا الي يضيع
_ معلش يا هندزة...
_ انا مش فاهم بتعمل ايه أم الكلمة دي بتعالج ايه بردو 
سكت وسكتنا كلنا كان متوتر بردو ورجله بتترعش طلعت ساندويتش من الشنطة وبدأت آكل كنت بمضغ الأكل وهو لسه في بقي قبل ما الاقيه مركز معايا
مديت ايدي بالساندوتش في وشه
_ ايه دا 
_ جبنة رومي
_ في لانشون بالفراخ 
_ ايوه
فتحت الكيس واديته سند ضهره واستسلم زي كل الي كان في الأتوبيس
_ أنا أصلي كنت ناوي أروح انترڤيو
بصيت ناحيته وهو باصص ناحية الشباك الي جمبي قطم من الساندوتش وعينه بتميل ليا
_ أنا ماما قالتلي الشغلانة دي مش بتاعتك
_ ليه
_ عشان مش بشهادتي
قطم حته تانية وهو لسه بيبصلي
_ أنا مهندس مدني اساسا
_ والشغلانة دي كانت عبارة عن ايه
_ محاسب
_ ملهاش علاقة
_ خالي الي كان جايبها من حد من معارفه
سكتنا اما هو قطم حته تانية
_ أنا مكنتش ناوي أروح الانترڤيو
_ اومال كنت هتروح فين
_ في كافية جمب الشركة كنت ناوي أجرب اللاتيه بتاعه
ضحكت وانا لسه بصاله وهو ولأول مرة بيبتسم
_ أنا أصلا فقري من