غفوة الحب ندا ذايد

باصص ليه كانهم مستنيين رأي جناب العمدة بجد.. ابتسم ابتسامة هادية وقال 
.. الدكتورة ست البنات يا جدي ومفيش أحلي من مرتي في الدنيا كلها 
حقيقي رد مكنتش متوقعاه منه بس هو عرف منين اني دكتورة وليه يجاملني بالشكل دا وهو ميعرفنيش كلهم ابتسمو ما عدا مرات عمي اللي كلام زين عصبها اكتر 
.. والله ياولدي كأنك بجيت محتاج تكشف نظر.. عين وصابتك والله 

كنت لسه هرد عليها بس مروة قاطعتها وهي بتطبطب علي كتفي وبترد بابتسامه حب 
.. دا علي كدا كلنا محتاجين نزور الدكتور يما دي غنوة زي الجمر مع اني هبدأ اغير كدا علي اخوي اللي مكنش بيقول كلام حلو لحد غيري 
.. انتي جلب اخوكي يا مرمر ودي حاجة معتتغيرش واصل 
للحظة ابتسمت حبيت انه رضاها وكان حنين معاها يمكن لاني ارتحت لمروة وحسيت بطيبتها او يمكن لان طول عمري كان نفسي في أخ او يمكن... خرجت من أفكاري علي صوت بابا وهو مع أخوه محمد واتعرفنا عليه هو ومراته طنط سعاد وابنهم مروان ...فضلنا كلنا تحت سوي واتغدينا مع بعض في جو أسري لطيف أوي كانت بس تعليقات مرات عمي صفاء هي اللي بتوترنا كلنا وأخيرا سمحولنا نطلع اوضنا نرتاح اللي كانت في الدور التالت من البيت حقيقي كنت مستنية الكلمة دي من بدري حاسة بضغط كبير أوي علي اعصابي من افكاري ومن نظرات زين ومن الحياة الغريبة اللي دخلتها فجأة دي.. 
المكان هنا ميشبهش ابدا اللي كان في خيالي اوضتي كانت كبيرة وواسعه وديكورها هادي ولطيف وكانت بتطل علي الجنينة الكبيرة اللي برا اتنفست بهدوء وطلعت بيجامه من شنطتي ودخلت اخد دش يمكن اهدي شوية خرجت لاقيت نغم عندي في الاوضة وكانها مستنياني وانا متاكدة من كمية الكلام اللي هتقوله دلوقتي واللي حقيقي انا مش مستحملة اسمع منه حاجة 
.. غنوة اخيرا خلصتي دا انا افتكرتك نمتي جوا 
.. كنت محتاجة افصل شويه والمياه بتهدي اعصابي 
الحقيقة ان المكان كله يهدي الاعصاب بجد مكنتش متخيلة انه حلو كدا 
.. اه لطيف بس دا مش معناه حاجة عادي يعني 
.. بلاش طريقتك دي يا غنوة اعترفي ان المكان عجبك وانك اټصدمتي انهم عندهم زوق حلو ومش زي خيالك وكمان الناس هنا كويسين انا حبيتهم اوي 
كملت كلامي وانا بقعد قدام التسريحة وبمسك فرشاه شعري 
.. نغم انا مقلتش حاجة الناس كويسين وانا حبيتهم والمكان حلو ولطيف اه وبعدين دا ميغيرش اي حاجة بالنسبالي 
.. طب بذمتك زين معجبكيش 
حطيت الفرشاه بعصبيه وقمت من مكاني 
.. نغم انتي اټجننتي هو
انتي فاكرة انه أنا هقبل بالجنان ده لمجرد ان طلع شكله كويس نغم فوقي انا متجوزه واحد معرفش عنه اي حاجة ومن غير موافقتي كمان في مكان مكنتش اتمني اجي فيه حتي لو في احلامي وبسببه ضاع كل تعبي ومجهودي في اني اسافر واحقق حلمي وانتي عارفة كدا كويس فكل دا ميفرقليش في حاجة غير اني لازم اطلق وامشي من هنا في اقرب وقت 
.. ممكن تهدي ومتبقيش مندفعة كدا دا كان مجرد سؤال أنا منكرش ان طريقة جوازك كانت غلط بس برده متاكده ان بابا مش هيعمل كدا الا لو فيه سبب قوي ومقنع كمان 
عند السيرة دي افتكرت بابا وقعدت بحزن 
.. هو لسه مش عاوز يكلمني برده 
قربت مني نغم وطبطبت عليا 
.. متزعليش يا غنوة بابا بيحبك واكيد هيكلمك تاني بس طريقتك كانت وحشة اوي معاه وحقه يزعل 
.. أنا عارفة اني غلطت بس بجد كنت متفاجاة أنا لحد دلوقتي مش مصدقة كل دا وبتمني انه يبقي مجرد كابوس هصحي منه قريب انا زعلانه منه اوي انه حطني فالموقف دا بس برده زعلانه انه مبيكلمنيش ده عمره ما عملها حتي اما صممت اني اسافر
معملش كدا انا تعبانة اوي يا نغم مش فاهمة حاجة ومش عارفة اعمل ايه 
مع اخر كلمة سمحت لدموعي تنزل بهدوء لاني بجد تعبت وفضلت تهديني لحد ما حاولت تخرجني من كل دا 
.. بس شفتي حماتك يا بت صحيح شكلها حرباية 
.. يا اختي بس متقوليش حماتك 
ضحكت نغم وكملت 
.. ماشي يا اختي مرات عمك شكلها مش طيقانا كلنا كدا علي بعض 
مسحت دموعي وقمت للتسريحة تاني وانا بفكر في كلامها 
.. بصراحة مرتاحتلهاش ابدا .. انا قلت مش طيقاني عشان مش حابة الجوازة دي بس لاحظت انها مش حبانا كلنا وكلامها كله قصداه وعاوزة تضايقنا تفتكري تبقي هي الكارت اللي هيساعدني امشي من هنا 
قربت نغم وقفت ورايا وبصتلي في المرايا 
.. بصي يا غنوة احنا لسه مش عارفين حاجة ولا عارفين الايام مخبية لينا ايه بلاش توتري علاقتك ببابا اكتر من كدا حاولي تعدي اليومين دول علي خير لحد متتصالحو وبعدين هنشوف هنعمل ايه متفكريش كتير كله هيتحل صدقيني 
قربت مني وباست راسي بهدوء ومشيت لاوضتها وسابتني في حيرتي وأنا بفكر في ان فعلا عندها حق لازم اصالح بابا الاول وبعدين هشوف وقررت انام وبعدين اشوف هعمل ايه ..
صحيت من النوم علي صوت خبط علي الباب بس مش خبط عادي ده حد هيكسر الباب قمت مخضۏضة فتحت الباب بعصبية 
.. ايه ايه في ايه حد يخبط بالطريقة دي 
لاقتها مرات عمي بصالي بعصبية 
.. ايه يا اختي نموسيتك كحلي كل دا نوم 
حاولت اهدي نفسي علي قد ما اقدر 
.. في حاجة حضرتك محتاجة حاجة 
.. حضرتي محتاجاكي تصحي وتقومي تساعديني 
.. اساعدك في ايه 
.. في تنضيف البيت وعمايل الوكل وشغل البيت ولا فكرانا الخدامين اللي جيبنهملك ابوكي 
بصتلها بعصبية وانا مش مستوعبة كلمة من اللي بتقوله 
.. بيت ايه وشغل ايه وانا مالي بكل دا اصلا 
.. لا يا حبيبتي فوجي لنفسك كدة انتي مرت ولدي يعني بجيتي من حريم البيت دي ومعندناش حريم تتدلع 
مسكت ايدي بعصبيه وشدتني من اوضتني 
.. انجري جدامي يا بت ليلي ولا امك مطلعاكو خايبين زيها 
كنت لسه بلف وهرد عليها لاقيت حد بيمسكني من ايدي بحنيه وبيرجعني وراه ..بصتله باستغراب لاقيته زين ! 
.. في ايه ياما علي الصبح معليه صوتك ليه 
.. هتحجر علي امك عاد جاية اصحي الهانم تنزل تساعدنا ولا عاوزني اشتغلها خدامه اياك 
.. معاش ولا كان ياما بس هي مش هتعمل حاجة ومش هتنزل دلوقتي دي لسه واصله امبارح شغل ايه اللي تعمله هي 
.. والله عال جاي تنصر بنت ليلي عليا بتنصر حته البت دي على امك 
.. يا اما هي مش حرب عشان انصر حد على حد بس انتي ست العارفين بالاصول ودي مرت العمدة مش اي حد وكمان الخدم في البيت كتير يعني لا انتي ولا هي مطالبين تعملو حاجة ريحي حالك يا ست الكل واللي تعوزيه الف مين يعملهولك 
مكنتش مصدقة انه بيدافع عني ولا انه واقف قصاد امه عشاني !! ليه يعمل كدا معقول بيحاول يخليني اوافق عليه ! خرجت من افكاري علي صوت بابا وهو جاي علينا بسرعه وهو بيتكلم معاها 
.. جرا اي ياصفاء علي الصبح مالك ومال بنتي 
.. بنتك تبقي مرت ولدي وانت اللي اختارت فاتحمل اختيارك يا ابو البنات 
سابتنا ومشيت وهي بتبصلنا پحقد وبابا مسكني من ايدي وقعد يبصلي بقلق 
.. انتي كويسة فيكي حاجة حد عملك حاجة 
بصتله وهزيت راسي عشان اطمنه وبجد لو هشكر الست دي على حاجة هشكرها انها سمحتلي اكلم بابا تاني
.. متجلجش يا عمي بنتك فالحفظ والصون انت عارف امي بس وحركاتها حجك عليا يادكتورة عن اذنكو دلوجت 
سابنا ومشي وبابا خدني دخلني اوضتي وكأنه افتكر تاني انه مبيكلمنيش وكان سايبني وماشي قمت جريت عليه ومسكته من ايده 
.. بابا أنا أسفة أنا مكنش ينفع اكلمك كدا وصدقني كل اللي انا فيه ميجيش حاجة جمب احساسي اني مزعلاك بالشكل دا حقك عليا والله مش هتتكرر تاني ارجوك متفضلش زعلان مني انا محتاجالك ومحتاجة افهم كل اللي انا فيه دا منك انت ارجوك يابابا ...
.. انا معنديش اغلي منك انتي واختك يا غنوة انتو نور عيني يا بنتي حقك عليا اني مقلتلكيش بس صدقيني كل دا لمصلحتك وهيجي وقت وتفهمي كل حاجة خليكي واثقة في ابوكي وانه عمره ما يضرك ابدا 
.. انا واثقة فيك يا بابا وفاهمة كل دا صدقني بس ...
.. من غير بس صدقيني يا بنتي انتي حكمك علي الدنيا
من براها دا غلط الناس هنا مش وحشين زي ما انتي فاهمة والبلد هنا جميلة ولو شفتيها هتحبيها يمكن اكتر من بلاد برا اللي ھتموتي عليها انا عمري ما كنت ضدك ولا ضد احلامك بس ادي فرصة لبلدك وناسك وبعدين احكمي انتي بتاخدي بالمظاهر ودي الحاجة الوحيدة اللي نفسي اغيرها فيكي وصدقيني زين كمان مش وحش ولو لفيتي الدنيا كلها مش هتلاقي حد يحبك ويحافظ عليكي زيه انا عمري ما ارميكي يا غنوة دي مش جوازة والسلام وهيجي يوم تشكريني على كل دا ادي نفسك
فرصة بس واسمعي كلام ابوكي 
بصتله وانا بحاول استوعب كل اللي بيقوله يعني ايه زين بيحبني هو يعرفني منين عشان يحبني وليه بابا واثق فيه اوي كدا قررت اني اهدي زي مانغم قالتلي ومزعلش بابا مني واحاول اخلص من كل دا بهدوء من غير ماازعله ووعدته اني هحاول وانا مش متاكدة اني هقدر احافظ علي الوعد دا 
باب الاوضه خبط وكانت نغم وماما 
.. الله الله وانا أقول الحاج فين اتاريه مع غنون انتو اتصالحتو من ورانا ولا ايه 
قالتها نغم وهي بتغمز بعنيها وبابا مد ايده 
.. احنا كنا اتخاصمنا اصلا يالمضة كانو شويه زعل وراحو لحالهم
.. اخرج منها انا يعني خلاص لاقيت حبيبتك ورمتني 
بصلها بابا ضحك وسابنا احنا الاتنين وراح حاوط ماما بدراعاته وقال
.. والله انا مفيش غير ليلي وبس اللي حبيبتي
ماما اتكسفت وطبطبت عليه بحب 
.. انت اللي ناصفني والله ياعلي من بناتك دول 
جرينا انا ونغم وبجد انا لو لفيت الدنيا مش هلاقي حد يحبني ربع حب بابا وماما لبعض في وسط فرحتنا ولمتنا اللي بتنسيني الدنيا حد خبط علي الباب وبلغ بابا ان جدي عاوزنا كلنا تحت 
غيرنا هدومنا كلنا ونزلنا لقينا الكل متجمع تحت وجدي واقف ساند علي عصايته بقوه وهيبة نزلت انا ونغم سلمنا عليه هو وجدتي وقعدنا كلنا لحد ما قطع الصمت صوت زين 
.. جدي هستاذن انا عندي شغل كتير محتاج مني حاجة 
.. اجعد يازين ياولدي هجلكم كلمتين وتوكل علي الله 
لاقيت عمو حسن بيبص باستغراب 
.. حصل حاجة يابوي ولا ايه 
.. حصل كل خير انا حبيت اعرف الكل ان علي ومرته وبناته ليهم في البيت زيكو كلكو مش معني انه غاب عن البيت سنين انه مالوش حج فيه دول مش ضيوف دول صحاب بيت واللي يدوسلهم على طرف حسابه هيبجي معاي مفهوم 
رد عليه عمو محمد 
.. يابوي علي يبجي اخونا وبناته بناتنا لازمته اي الكلام دا عاد 
.. انا بوضح للكل يا محمد يا ولدي احسن فيه ناس كده تحب تسمع الكلام بنفسها
لمحت جدي وهو بيبص لمرات عمي صفاء